Nazarbayev University Жоғары бизнес мектебі AMBA және BGA-дан бес жылға қайта аккредиттеуден өтті

Nazarbayev University Жоғары бизнес мектебі (NUGSB) MBA және Executive MBA бағдарламалары бойынша AMBA және BGA-дан бес жылға қайта аккредиттеуден өтті. Шешімді AMBA & BGA Халықаралық аккредиттеу жөніндегі консультативтік кеңесі сараптама нәтижесінде қабылдады.

2023 жылы алғаш рет аккредиттелген NUGSB халықаралық деңгейде танылған екі ұйымның аккредиттеуін сақтап қалды. Бірі — әлем бойынша менеджмент саласындағы магистратура бағдарламаларын аккредиттейтін MBA қауымдастығы (AMBA). Екіншісі — жауапты басқаруды әрі қоғамға оң ықпал етуді ілгерілететін мектептерді мойындайтын Бизнес түлектері қауымдастығы (BGA). AMBA аккредиттеуі AACSB және EQUIS аккредиттеулерімен бірге бизнес-мектептер үшін беделді «Үштік тәж» (Triple Crown) құрамына кіреді.

AMBA & BGA NUGSB-нің Қазақстанның адами капиталын дамытуға қосып отырған үлесін жоғары бағалады. Сарапшылар Мектептің Nazarbayev University мен елдің ұлттық даму мақсаттарын іске асырудағы рөлін де атап өтті. Сондай-ақ Мектеп Қазақстан мен халықаралық бизнес-білім беру қауымдастығы арасындағы маңызды көпір ретінде танылды. Оның арқасында студенттер, оқытушылар және басқа да мүдделі тараптар жаһандық академиялық және кәсіби диалогқа сенімді түрде қатысып келеді.

Сараптама барысында NUGSB-нің қабілетті әрі жоғары білікті MBA студенттерін тұрақты түрде тарта алатыны да атап өтілді. Сарапшылардың пікірінше, студенттердің академиялық жетістіктері, кәсіби тәжірибесі мен белсенділігі Мектептің барлық бағдарламаларындағы оқу ортасының сапасын айтарлықтай арттырады.

Алдағы айларда NUGSB AMBA & BGA-ның негізгі іс-шараларына белсенді қатысады. Қараша айында Мектеп Сингапурда өтетін AMBA & BGA декандары мен директорларының Азия-Тынық мұхиты конференциясын ұйымдастырушылардың бірі болады. Конференцияда Мектеп «Бизнес-мектептер өз маңызын сақтай ма? Жасанды интеллект және MBA-ның болашағы» атты пленарлық сессия өткізеді. Декан Конингс INSEAD профессоры Итай Стернмен бірге жасанды интеллекттің менеджмент саласындағы білім беруді қалай өзгертіп жатқанын және болашақта бизнес-мектептердің рөлі қандай болатынын талқылайды. 2027 жылғы мамырда NUGSB Парижде өтетін Декандар мен директорлардың жаһандық конференциясына қатысады. Онда ресми салтанатта Мектептің бес жылға қайта аккредиттелуі атап өтіледі.

Бес жылға қайта аккредиттеу — Қазақстанның мүддесіне қызмет ететін әрі халықаралық деңгейге барған сайын белсенді шығып келе жатқан NUGSB-нің дамуындағы тағы бір маңызды белес. Мектептің халықаралық деңгейде танылуын QS Global MBA Rankings 2027 рейтингі де растайды. Онда NUGSB-нің MBA бағдарламасы Орталық Азиядағы толықтай ағылшын тілінде оқытылатын MBA бағдарламалары арасында бірінші орын алды. Осы жетістіктерге сүйене отырып, Мектеп өз бағдарламаларын дамытып, оқытушылар құрамын және бизнес қауымдастығымен байланысын нығайта береді. Сондай-ақ студенттер мен түлектерге Қазақстан мен әлемдік бизнес-білім беру қауымдастығы арасында байланыс орнатуға жаңа мүмкіндіктер ашады.

Қосымша ақпарат: AMBA & BGA декандары мен директорларының Азия-Тынық мұхиты конференциясы 2026: https://www.amba-bga.com/events/apac-2026